Kiriwina           28,784             16,725             5,627               15,069         13,715

Besa metoya 2000 census PNG Gabena lasolukula pela PNG tomota khalabawa. Igaugwa pela toBouti (eligible voters) besa metoya 2007 election lasisonukula.

Besa metoya 2000 census PNG Gabena lasolukula pela PNG tomota khalabawa. Igaugwa pela toBouti (eligible voters) besa metoya 2007 election lasisonukula.

Valu kwetala kwetala lataini labigitoni khalabawa kweluwalima-kweluwayu-kweyu (72) e, asivaluwalima-sivaluwayu-sivatolu (73) bigatona. Olopola kwetala yam, khena basivayu , galaga basivavasi bigatona; khaukwau, lalai, kwayai, galaga, wabogi. Besa olopola tubokona May 25th e, isakhawari ila June 29th – bitalivala makhala kweluwatolu –kwevasi (34) yam olopola. Mokwita goli kwevasi yam gala awotetila pela uula kunakuna deli goli agusomata e agisemwa akhapwi yawegu sitana. Bitasonukuri khalatomota olopola Kilivila pela labigitoni besa bogwa makhasana 29000. Valu kwetala kwetala khalabawa olopola Kilivila makhasana kweluwalima-kweluwavasi-kwelima-kwetala (96). Kwevilesi wala valu/khatuposula vilokikekita gala aloki, pelaga vilovakhavekha bo laiyai. Makhala Simsimla gala ala, Lobuwa, Siviyagila, Giligali, Waruma, e vakhela kwewovau valu avalai,- makhala Orekoreko, Okhoridakwa, Okirimwa, e makwesina goli. Kwevilesi abiya alau poulata khababwela makhala Yalumgwa amweya Oluweta e, Moligilagi amweya Bawai. Vakhela ulataina alilola wala e, kwevilesi tuta wa baska, deli wa dinghy. Oturaki gala asivatala – khailela biga - atabu.

Tomwaya Dennis Young, makwa election lewokuva olui leburigaga, April 2008 - mitaga yamala igau moimwamova. Kumtakhavatisa  bibwena.

Silovala Tolukwabata latula egini veyala sileta eluki amakhala Lae Tech college olopola sala lesisakhaulasi pela uula ikokolasi sena bidubadu computer lessons e, mtosi gala inukwarisa. Ininayuwasi bimamasi. Minawena yakidasi epeulaki wala eginigini deli la tapwaroru.

Iga kugisesa Rodney Clark usola Serah litusiya. Avetuta egudivakhavekhasi ki ,kudokhesa sitana ikaiki uwasi pela litusiya biginisi KHS olopola. Gala wala. Pela uula Skuru gewagewa e gala magisi litusiya bimesa gewagewa wala. Mapela, ekarewaga siesaesa ewitarisa litusiya elosa oilovekha iginisi. Yakidasi magigu makhala – desi yomada esaesa okhomlagela deli sagari e, gugwadiga khasi mwau bikanuvivila omitadesa.

Personal Communication, HEO Damien Tolawaga,  Losuia DRH, 16.06.07

 

Toveyola Dr.Morewaya lakhabitam lekugwewa olopola PNG pela kidamwa veyom lekariga emagimgwa bukunukwari amakhala khala lewa o, khena aveposeni lekoma –mesinaku wala biladuduri bimwa e bikatuviri khata, lopou, khapuwa, sileu e, bilukwem ama uula e, bimwa igini la ripoti birigewaga bwadala iyemibwadisa. Khe, mtosi gugwadi latakhalu igasi gudisi yakidasi, veidayasa, litudayasa, gala pela koyakoya. Taga gala wala imemesa oduvalusa pela bipilasisi valu khatuwalela. Sikeda Alotau wala bitubutobusi e bikikeitasi.

Iga Alotau akhatupoya Dr. G. Tokhabilula:

“Bwada, kidamwa lawini e latobudakiga ulai daspetasa e, avekedaga sitana bima oduvalusa ipilasi datokwatoulasi?”

Elivalaga: “Tuwa, maresina deli guguwala paisewa laiyosi. Mesinaku wala kumapu ula ticket deli khabosisu mapula e bawa khena kwetala o kweyu wiki e badodougwa tokwatoula valu valu bimmeyesa Losuia agisi amakhala. Ambesa lebwadi e, bapilasi, ambesaga sena mwau bakhatubiyasi si ripoti e bitanei sikeda bitawitari khena bilosa Alotau o galaga, Moresby.”

Lakheita goli Mosbi akhatupoya minana gwadi Dr. L. Sirigoi pela makwesi nanamsa e, makhegana wala lesakhegu. Tokwarewaga wala Memba (MP) yakida bitauri sikeda Doketa deli tokwabitam e, biwotetilasi. Minana ekebiga bogwa ebwadi, bikatuparisa tutela pela Kilivila bimesa ipilasisi tokwatoula. Mesinaku wala sikeda deli sikabosisu mapula.

Besa yagala kibudaboda taga mokwita pilasi igau bitaulaisa Losuia ospeta bikwevekha e, bibwadi makwesi mwau komwedona.

Makwa speta project laninamsi gala pela khatuyawana, sena kwevekha. Magigu bileya laDoketa (teyu, tetolu), la turaki, la waga, Opertation Theatre, X-ray room, morgue, bwala valulu, outreach programs, VBA interlinked, TV, computers deli internet access, fax machines, entertainment area pela tokwatoula, valu tokhatumigileula, duraiba, tokwatoula sibwaga, staff exchange programs/workshops e, komwedona goli mkwesina  vavagi. Avetuta paisewa bivitoula, levy fees pela ospeta services sitana bipilasi makhala recurrent costs deli goli auxiliary staff salaries.

Uula latola pela makwesi kweyu projects lagigisi. Khalamwau davalusa mesinaku wala laPEULA valu bitavakhasisa pela bibasi esaesa, deli pela daMOMOVASI bipilasi tubwa kwetala kwetala. Pirisi yokwami gala khakokola, o khena ninayuwa mitaga magigu bita khatotilasi. Bikugwa wala ToVote yokwami bukwatotilasi nabweya bugiyu. Gewesa khomlagela e, kuvatusisiga bibwena pela tubwa makhateki paisewala.

 

KEDALA DAKUNA – ave manila?: SOURCING PROJECT FUNDS

Mkwesi kweyu projects laninamsi gala pela khatuyawana. Gala lagigisa makhasana K1,000-K10,000 projects, pela gala magigu bulupusapwasa o, khena kimimisi igau bikabwaga e gala bipilasi valu komwedona. Yegula lagigisi mkwesi projects makhasana K5m-K20m projects – besa makhasana $2-6m USD. Gala tona manila bo ebwadi bitasuvali olopola kwelima tetu pela skuru deli speta.

Yegula lauvalam magigu taem bayosi pela davalusa Khalamwau bawotitari. Avetuta laiseuri soccer olopola Okhebom e, lagisi khalasalau lewokuva, olui lagisi valu egabu khalasia e, lagisemwa laiseuri makwa wewa project. Pela uula magigu kwemmwamova nanamsa deli vituloki, gala kwemtamata. Besa uula gala ikikau nanogu khomlagela. Bogwa lagisi pwepwaya deli bwarita khalamama. Ulakha omitibogwa taga besa tuta sebakhana deli khetasusila wala. Yena kuyu, dubakhalakhala, toma, sigau, omitibogwa taga besa tuta mweyawa, vaya deli tuwa, monawa tomota lesavalisa pela sitana kusukwasu. Pela uula tomota sena vakhegaga e baleku gala tona. Khai tatamatisa, pwepwaya legabu eseki valu, khai deli bwarita gala lakhabowewasi. Dakedasi pela khaukweda khala bwena deli goli gugwadi khasibwena mesinaku wala oginigini - mitaga ginigini bwena.

Magigu tomota bisakhegusi mandate – KHAREWAGA – pela odubasi tomota babasi nigada oilovekha. Nigada oilovekha auvagi e, abubani mitaga lauvatowa odabala wala Uni - besa pela wala okhabopaisewa, Uni olopola, gala pela valu. Makhala makwa wewa project besa oyagala wala Uni mapela Uni wala lataem ikau. Besa uula gala sena ayosalau amema avakhawari. Makwena research project lamweya Bwemapou e lasiwa Kwaradu bo makhala wala. Taem gala ayosi ibwena mokwita pela batoilaki valu pela sena yobusabosa vituloki.

Dimdim lameya tetu lemwa omilamala okigirikitisi gala pela Gabena olawitala mitaga besa khekulela yagagu oilovekha. Avakha lenukwalegusi oilovekha e, lesukwemwegusi e lauwotetila. Lilobogwa mtosi tetolu minaGermans pela ZDF television lemesa lemweeya PMV Dukutaisi lesakhaula bo makhala wala. Deli goli dimdim budatala Swedish archaeologists lalau Mwatawa deli Labai khakerisa valu liliula makhala wala. Ituwariga silovala makwa consultancy lalau Southern Highlands pela Gabena la project khadavekha si highway khalakibwabwela. Gala khamatebiwekisi minaKilivila sena inukwalemasi oilovekha. Latolaga magigu bauri keda makhadasina khadavakhavekha bibwena.

Besa tuta bukuweya wa internet yagagu e bukugisi goli avakha avakha ulu paisewa bisunapula. Bogwa sena lakhayegila senela deli goli davalusa livalela olopola valu watanawa. Mina Diyapani besa tuta sena wala inukwarisa pela Bwemapou livalela. Makwesi paisewa lauvagi pela uula magigu vavagi kwemmwamova deli kwekanigaga. Gala ayebweli wabu, sepulaki deli khomlagela. Sena khakhapisi lopogu pela tomotela Kilivila levigakhesa candidates makhala namakhava, welova deli nagowa. Magigu Kilivila bisivila pela khalabwena tubwa makhateki. Yakidasi wala matubona, nabweya bugiyu bita tagwalasi, bita khatotilasi e bidaila valu pela dabuboyasa khasibwena.

 

Keda khadatolu laninamsi pela funding (mani bisui). Ekawegu makhala kweyu tetu olopola laninamsi makhadasi keda.

 

• Oiluwela: Local

Khadamatala keda oiluwela wala. Makhadana keda sena kukuluvayusa deli semiya mitaga khala bwena pela khatuula ipilasi nigada oilovakhavekha. (2007 Goroka MP elect eritaki makhadana wala.) Kidamwa bawini  magigu basuki LLG wa chamber e bakhominimani amakhala khala pusim valu/ward kwetala kwetala bukulovasi mani pela makwesi projects. Besa yagala khatuula o, khena khatumkoila – makhala semakhai kedala. Mitaga besa mimani bikeita bima pela valu. Khalaiseki makhala – tautora tawau deli vivila khadabawasi makhasana 15,000. Kidamwa tetala tetala bitalovasi K2 tetala tetala e, olopola nayu tubukona, besa bo ebwadi bitaweyasi makhasana K60,000. Kidamwaga K12 tetala olopola naluwatala nayu tubukona, besa bo ebwadi bitaweyasi makhasana K180,000. Kwelima tetu besa K900,000 – pikekita wala K1m.

Tuvela makhesina kheyoyowa lememesa oduvalusa gala wala sitana kwetala dakunela takhakhausa. Sivayu kwetala wiki, lememesa. Avakha bomala bitabuburisa kharewaga e bitawotitarisa pela mtosi pasindia tetala bimpumapusi makhasana K2 makwa taem bikotasi o, khena otutela bitolasa. Mesinaku wala takheyaku APNG e, tabiya PNG Govt. lakharewaga pela tax revenue schemes e, olui tawotitari kharewaga olopola LLG wa chamber. Gala khowalova. Bitamwakheya goli makhesina waga Starships lememesa kwetala wiki kwetala e, makhala wala bitaigaki. Sena pasindia e, sena mani. Mesinaku wala kharewaga bipeula e, wotetila bwena.

Besa makhadasina kedala mani otaneneisi – gala pela vayayola mitaga magidasi bileya dapeulasi. Gabena gala ibwadi biyamati komwedona wala khadamwausi. Gala tona lamani. Kidamwa Gabena bivitusi dapwetukulasi e bimweeya bitoilakhedasi bibwena. Kidamwaga khatuula gala e, nigadamakhava wala e, bwena kuigakolasi.

 Makwesina vavagi tokwarewaga wala khatotila deli tagwala pela davalusa khalamwau - DUBUMI. Khomlagela gala iyebweri, sekumwelaga khala tilaula mokwita. Igau kugisesa DUBUMI KHEUWALA. Pela sena kudubumisa tapwaroru lapaisewa makhala iyebweli deli iselai tuvela goli iyamati tomota khasilamkola ibwena – mapela avetuta tuwamiya bilivalasi semakhai sena wala khabikaula.  Mitaga semakhai paisewala natala wala tubukona olopola – gala pela kwetala tetu komwedona. Khatunugula makhala, vilokikekita biwaweyasi makhasana K2-3,000 e, vilovakhavekhaga K6-10,000.

Igau kugisesa mina Khaduwaga sipwetukula metoya osidubumi. Pela sena magisi si bwala tapwaroru biulaisa kwevekha wala e, tubovila goli bimesa bisusuisi wala, igisemwesa ikanekelasi khala paisewa makhala. Metoya osipeula titolesi ebanisa K52,000 pela sibwala. Mkwena wala tetula e iyokewasi iselasa tuvela pela semakhai e, leweyasi tuvela K25,000. Mapela kwetala wala tetu olopola lebanisa K77,000! Mokwita goli pela Khaduwaga ilovekha, mitaga mokwita tokwarewaga wala DUBUMI, deli TAGWALA. Mapela pirisi yokwami desi ninayuwa. Bogwa ebwadedasi bitavagisa wotetila kwevakhavekha deli goli matuwa paisewa pela litudayasa.    

• Gabena Lakhatu-ula: Government Budget Appropriation

 

Khadayuwelaga keda lagigisi makhadewenala sena mipwai deli semiya – pela bogwa makhala kuigakhesa khami sawa titolemi, taga mwadala pela tomota komwedodasi! Tevilemi besa tuta bogwa wala levagi kibila udami pela mwada khalamani makhasana K1.5m kwetala tetu. Vakhela tomota leiyogagi dubami deli goli miCandidates, pela mwada khegiya valu la projects gala, mwada khegiya wala mikamkwam. Vakhela minanamsa mwada Gabena bogwa lekatupari khegiyela khomlagela – mwada makhala Gabena la bunukwa yokwami e, besa biuvakham wala! Biga mokwita alukwemi Gabena ola budget tetu tetu gala sitana ikatupari gulatala mani pela wala tomotela Kilivila sikomlagela. Avakha letugwari ola budget besa pela wala laprojects, support grants, bitalivala pela tomota sikabosisu khala pilasi.

Gabena ola vilavila tetu kwetala kwetala imweki ituwari ituwari khatuposula. Ituwari pela health, education, transport, road deli sea infrastructure, agriculture, e makwesina goli. Khalaiseki makhala. Tetu tetu Losuia District la support grant makhasana K500,000 pela valu khala pilasi. Avetuta bima besa K500,000, K250,000 biloki MP lakharewaga e bininagi amakwesi projects lekasari besa tomota e biseki. Vakhela tuta luipuwaya wala, gala mokwita migarena projects. Makhala mimirisi tomota bitakheusa khatupotala keda e, bisekiga mwada K10,000. Pela uula bo eluipuwai. Taga besa lakharewaga titolela mesinaku wala bila khalaigimkoila tetu igau bigini la ripoti (i.e. Returns) pela amakhala leigaki khala kimimisi besa mani. E Gabena latopaisewa bigisesa khena bo bwena ripoti khena gala. Bogwa sitana tebaweki MPs leiyosi kharewaga pela ripoti sitana isulasula e, maniga khadata lakeda lemwemwa. Khalaiseki makhala,ikanukwenu lamani titolela bilalasi o khena bipilasi pela sagari, imwekiga project manila ivigaki lalasi o, khena lagisimnakha. 

Khabuluyuwela K250,000 biloki Ward Councillors bikarewagisa avetuta bibodasi wa chamber. Makhala wala, ave projects si Wards eninagisa e khala mani mwada bikenagisa magulawenala. Wards khalabawa 33 e, mokwita gala kwetala tuta igisaki matagu simitini Councillors wa Chamber taga metoya oguligalega vakhela tuta khominimani wala e, gala ibokurisa amakhala Wards sinanamsa. Vakhela tuta bisewasa wala gala e, bitorisa wala kimimisi biloki wa wards olui bila valu kwetala kwetala. Avetuta besa mani bivilobusi ovalu bitamweki makhasana K500-K5,000. Khe, besa gala wala bibwadi kwetala kweutona project. Bimweeya biwanemasi tommwaya khena bigimlakhesa raisi, sugwa o, tia bimwamsa o, bikomasi e tamwesa taigavausi tuvela. Taga besa sulaokuva wala. Kharewaga gala makhala. Besa tetula militela latemeyesa bo makhala wala. Besa uula segwaya, lapeki kimimisi, vilabwela, sigiribwela pela gala ivavagi maneyala. Tuvela goli Gabena lewitali lema gala pela khomlagela.

Kweyuwelaga bukuitusi magulana mani lakeda makhala. Mtona MP lewini kwelima tetu biyamati makwa opesi. Losuia district khalavilavila tetu tetu K500,000. Avakha bomala bitakatunuguri magulana mani biloki kwetala kweutona project makhala speta okhena skuru. Pela igau kugisesa. Kwematala tetu K500,000, kweyuwela K1m, kwetolula K1.5m, kwevasila K2m e, kwelimela K2.5m. Kidamwa lawini mesinaku wala K250,000 bo batugwari e, khabuluwelaga baloki tawau wa LLG chamber kakhominimanisa. Bo desi khatuyawana deli kimimisi valu manila. Besa tuta bita khatotilasi.   Khe,besa Gabena lakhatuula pela manila valu – khadayuwela dalkedasi..

 

• Oilovakhavekha: Overseas Donors

Khadatolula keda lagigisi makhdana oilovekha.Oilovakhavekha sena bidubadu iyebwerisa pilasi. Makwesi kweyu projects lagigisi sena kwevakhavekha, gala pela khatuyawana. Gala sena aninakusi besa wala Gabena, pela gala tona lamani. Pela K20m ibwadi wala oilovekha bima – gala besa Gabena.

Makwesi valu kwevakhavekha makhala NZ, Australia, Indonesia, Phillipines, Saina, Singapore, Diyapani, S/N Korea, Amerika, Italy, Germany, UK, Paranisi, Switzerland, Sweden- deli goli boda kwetala kwetala makhala, IMF, World Bank, UNDP, ADB, Church Organizations, NGOs, sena wala itagwalasi bipilasisi.

Mitaga tokwarewaga wala yakidasi bitakhatubiyasisa nigada bibwena. Besa uula lakhatuloluta sena peula pela khatuula – pela bipilasi e bibasi nigada. Bikugwa wala ripotila valu bitakhatubiyasisa – makhala tevila gugwadi, tawau, vivila, tubovau, tommwaya, nunumwaya, momwau, tokwatoula, lelia kwetala kwetala, tokwariga, pwepwaya, bwarita lapeula deli lamama e, Top-Up kwevila, high school khalagigisa, khalabawa toginigini, toituloki, khasibawa emamamasi, epapeulasi e, makwesina goli komwedona.

Biwokuva takhau mkwesi kweyu khatuula (Oiluwela deli Gabena) tasela livalela odabala e tawitali biloki makwesi valu oilovekha. Mkwesi projects khala budgetdeli wala biloki. Khalaiseki makhala bitakhenagi K1m pela Doketa, K1m pela Operation theatre, K1m pela turaki deli waga, K1m pela bwala valulu, K1m pela ancillary topaisewa, K1m pela maresina, K1m pela extension programs e, makwesi goli. Avetuta bitawitala, khena komwedona wala bita suki, galaga kwetala khabopilasi imwa oluiga kweyuwela, tata bita khalota.

Avetuta mani bitugwarisa, gala pela baikila wala deli bokesila mani bima isigiyeri valu – makhala semiya elivarisa. Besa dakuna livalela bisukwemwa Gabena ikabweri biwokuva olui bila obaniki, bileya kharitoyamata e, oluiga bilaisa biloki makwesina kweyu projects. Ituwari khala mani pela makwesi projects khala study, guguwesi mapula, mapusi to-ulai deli towotetila, mapula waga freights pela guguwa bididagisa bimeyesa e, makwesi goli komwedona.

Biwokuva e bitaitoulasi ulai. Besa khena bikau kwetolu tetu bimwa ebitaitoulasiga ulai. Tereponi, Radio programs pela tomota binukwarisa update progress, faxes, internet access makwesi bisuisi nanakwa pela bikabi khalasipoi paisewa.

Mapela kedala mani pela makwesi kweyu projects makhala: Oiluwela, Gabena e, Oilovekha. Bitawaki kwetinidesila olopola kwelima tetu e bitabani mokwita pilasi kweutona pela tubwa makhateki deli khabilabi pela valu komwedona.

 

Avetuta lama Kwabula abigatona lavenoki e, letokhewa Deidei elivala makhala.

Deidei: “Tawa, mainala wa valam e, mainalaga simla.”

Mokwita iboda bitapwetukulasi, bitapeulakisa deli bitakhatotilasi olopola kwelima tetu olui bita wewasisi bila tuta khaduwanoma. Kwelima wala tetu, gala tona!

Avetutaga labigatona Kumwageya olopola e, labiga Mokhesopi makhala.

Mokhesopi: “Bikaiki biminumki, Biminumki bikaiki.”

Biga mokwita. Kidamwa bikaiki woula besa tuta matubona yakidasi e biminumki woula nabweya bugiyu. Kidamwaga biminumki woula matubona yakidasi bwena bitagisakhesa wala valu khala mwau e, nabweya bugiyu bikaiki woula.

 

KHOBODA: CONCLUSION
           
Khe, uula latola pela makwesi kweyu projects. Magigu Kilivila bigini bibwena, bikabitam bibwena pela besa tuta lagingini edokhesa dimdim sub-standard, mediocre o, bitalivala yomileli wala. Ekibudibwadi dabala Kilivila e, Kilivilaga lakeda deli laesaesa khadatinidesi – Oginigini – mitaga ginigini bwena. Kilivila lakhabitam gala yomileli – besa khala vilavila besa Guyau. Kilivila bisimalaluva yakidasi bitaitoulasi e, matubonaga omatadasi bisibwelakisa. Yegula magigu bauri wala mitadesa pela bitaitusisa e, igaugwa omatadasi gugwadi bisakhawarisa davalusa bibwena. Biyokewa Kilivila bisimalaluva bibwena e, bimweeya bita tomorosisi mokwita e, bita saiyasi mokwita deli koyakoya e, dimdim. Besa tuta etumkwedasi khemagu e, bwena bitakhapakikisi wala besa dimdim deli goli koyakoya. Besa uula avetuta bitasuisi wabwala kwevekha, bwena bitakkepapasi wala besa koyakoya – gala sitana bileya daKharewagasi - gala wala!

Uluvalam magigu bitadubakhewasa deli bitatomwaretasi mokwita. Ilavasi dimdim e, ilavadasi. Galaga, kweibakwesi e, kuluwatadasiga! Ulagigisa deli ula pwai makhala:

“Makwa tuta balagi gudisi Kilivila khena Sydney, Brisbane (Australia), New Zealand, Los Angelos (Amerika) or, UK (England) epupaisewasi e lemesaga Kilivila iwewasisi deli litusiya olui bikeitasi osipaisewa – as professionals – gala pela wala iveyasi dimdim ilausa – e, khena goli lasisu oilovekha, Moresby, Alotau o khena Okheboma – mesinaku wala ulabiga bakhebiga – ‘Oowe-e, lesivila Kilivila.”

Magigu bitebiwekisi Yolisaguyau, Terence Togumagoma, Allan Dindillo e, mtosi goli lepupaisewas oilovekha. Avakha bomala, avela bisilibwadedasi? Yakidasi wala bita kharewagasi besa tuta. Mapela nabweya bugiyu kuboutisi bibwena. Kunagisa mitowotetila bibwena. Kidamwa magim mtona latum bivagi Doketa, pilot, engineer, lawyer, businessman tovekha o, khena tokwarewaga tovekha – avakha bomala, avela bisilibwadem? Mesinaku wala kutagwalasi igau akidumwalu KHS bibwena. Kwelima wala tetu e, bikeitaga bila oyumami deli litumiya.

Pelaga Losuia ospeta khalawotetila – a, besa pela khadabwenasi yakidasi ovalu. Ave mwau wala bisunapula ovalu magigu makwa mwau Losuia wala olopola bitaku. Gala bikaiki woula bitaneisi pilasi avevalu tuvela. Kidamwaga kupakhesa khena okuwowouyasi e, bwena aom. Avetuta bikatoulasi khena bibodasi mwau litumiya o, veimiya nabweya bugiyu e taga kuvalamsi. Gala bukusagarisi pela okupakhesala keda mokwita khalasavari!

Lakhatulakhemi desi ‘politics’ – wabu, kurimigiyaweda, topepela, burigimwala, bwakurimakhava deli neimi khamkwam e, khaukwedaga khala mwau bukuvalaisa – deli goli yomada mkwesi kweyu mi’esaesa.

Khalaiseki makhala. Kidamwa sena magigu bamapwemi ToBouti yokwami tetala tetala e, khala mani makhala pela Kiriwina-Goodenough (KG). Khadabawasi toVote mokwita 26,000 pela KG.Kidamwa bavigaki khamisebugibogi K100 tetala, tetala obogila oluiga biyam buku boutisi e, besa khala mani makhasana K2,600,000 (K2.6 million kina)! E pelaga Kilivila la Tobouti makhasan 16,000 khalabawa e, bamapu K100 tetala tetala, besa khala mani makhasana K1,600,000 (K1.6 million kina). E, kidamwaga bapata makhasana K50 tetala, tetala e, besa khalamani makhasana K80,000. E, mitaga pela uula bita wini mesinaku wala takibwadi makhasana 13,000 (edokhesa 50%+1) tobouti khala bawa, mapela bayumwasi makhasana wala 12,000 tobouti khasibwa e baseki. E, khalamani 12,000 tobouti besa K120,000 pela K100 tetala tetala o, K60,000 pela mwada K50 tetala tetala. Kululuwaisi, besa maniwokuva wala – raisi, tia, sugwa, buwa e, bunukwa gala deli okhalawa.

Bukuitusi mokwita bibwena gala wala tetala tonagowa candidate mwada makhasana khalabawa mani bikatilai pela wala sekimakhava o, yobesobesa. (Mokwita wakoya sedayasa iuvagisa makhala, mitaga mtosi sena vakhegaga si’esaesa deli sena vakhegaga sivelau besa tomota deli Gabena lamani. Yakidasi bita tapeseisi mitaga gala ibwadedasi pela gala da’esaesasi.)

Mapela siliovala khena semiya leuwademi mwada simani makhala khala bawa mitaga gala isuki valu deli yamila; vakhela bigaokuva wala! Tuvela, avakha besa vakhela khatupwepwaya wa ‘base’ o, khena olalasi besa tomota e, manilaga am-metogiyala? Avela isiseki? Party lapilasi gala tona, khena makhasana wala K5,000 e deli khekwabu biyosari. Iboda candidates bikamturisa amtogiyala simani. Kidamwaga gala besa bo khena levakhomedasi mani gewagewa. Gala tanukwarisa khena wa sula lema khena gala? Kidamwa wasula, mtona candidate etagwala e lesui lema mapela gala wala idoki biyowola pela sula. E, pela bogwa leiseuri makhala, avetuta biwini besa bogwa ekaturirisi wowola e, wa sula wala bisisakhaula. Sula kedala makhadasi, biga mokwita gala wala kwetala Khabitam makwena.                                                        

Tetala candidate elukwegu silovala (2007) lelai makhasana K60,000 pela election campaign. Party epilasi K5,000 wala. E pelaga 2002, lelai makhasana K200,000. Party lapilasi, makhasana K20,000 wala. E, teyuwelaga pela 2007, khalagigisa wala layobesobesa adoki makhasana K500,000 lelai galaga, K1,000,000 million kina. E kidamwaga bivakhasisa biloki mokwita wamwau, maresina deli gugwadi si School Fees (SF) mapula – tomota bo emati bivitusisa e, biboutisa wala. Taga makhala tomota sinagowa e, makhala goli candidates. Yomada wala metoya oigimakhava. Bo ebwadi bitavabwadisa makhadana nanamsa e bitakhatum-mwesisa nagowa.

Laiseuri ula bigatona lakhatupoi khawagu: “Bita wotetilasi, khena bita uvakhamsi wala?” Wosi enigadedasi magila ‘Bita wotetilasi Bwena.’ Bita torikaisa valu Khalamwau! Vakham,wabu, khomlagela o, sekhava ‘politics’ desi – sekumwelaga apeki wala pela uula gala tayosisa khabilabi esaesa. Mwasawa bogwa lemati mitaga lakhabebai magigu bikugwa igau tawotetilasi ibwena e, olui bita mwasawasi. Avetuta esaesa bisuki valu e, mwasawa bitakhau bimriyaki valu – simwa maneyala. Sagari, vilowosi, putubora, girikiti, tapwaroru deli gabena khala phakha e makwesina goli. Besaga tuta tayomilelisa wala. Teyu ipakhapakhasi, teyu ikamkwamsi e, vakhelaga tagisimakhava, talegimakhava deli tasukonamakhava wala! Pela uula gala tona esaesa e, mwadaga bitasekhavasi. Kilivila khalabawa 30,000 tomota – gala tauvakhoma – olopola natala tubukona. Taga kwelima tetu bitapwetukulasi bibwena e bitabanisa pilasi mokwita pela Kilivila komwedona – gala khatupotala wala!

Mkwesina kweyu peni, khaula e, buwa – ga, isumsomasi wala pakhala tapwaroru, Skuru, Speta,Youth, sagari e leiyaisa olopwa natala tubukona. Besaga mwada gugwadi si school fees, lubwau khegiyela minasi tubukona bitawesa – gala, vakhodari wala. Bwena bitat-tokwabasi wala besa topaisewa. Veyoda khena gala veyoda, bwena goli biwaweya wala kwai lodidibwa deli khalamimi. Khala wotetila mokwita vakhela tapakhesa. Khalabwena mokwita Skuru Bwena deli Speta Bwena pela tomota komwedona, gala pela khatupotala wala khatuposula!

Kidamwa lawini besa kwetinidesi wala paisewa bapuipwai: apeki pakha (ave pakha wala), apeki ugwaboda bwetiyala (vakhela sikarewaga bwena goli bikairi dubasi okheyoyowa mwada khala tulatula Member), apeki kimimisi nigada pela mautisi mwada kwetala valu la project e, mwaugwa oskuru bikanukwenu. KHATUYAWANA APEKI!

 

Khe mekeitala…

NAGA BWENA: LPV AWARENESS

Khe, bakhatuboda ulabigatona makhala. Magigu baritaki sitana livalela makwa election kwevau pela wala bakhatuloluta. Dimdim ledokisa yagala Limited Preferential Voting, Gabena lekemapu lerigemwa makwa kwebogwa yagala First Past the Post. Pela KG Open Seat, khamabawasi lakhatolasa 19. Telima tetala mina Goodenough e, 13 yakidasi Kilivila. Metoya ogu itopwapwa titolegu mtosina sedayasa mina Goodenough gala biwinisi. Wini bikeita wala bimakheyadasi yakidasi minaKilivila. Gala pela minakukologu koyakoya o, khena batailaki sedayasa mitaga ulagigisa wala tawau gala ibwadi wotetila. Besa yegula titolegu ula itopwapwa.

E yakhamesa 13, metoya wala ogugigisa deli ula dubumi teyu wala tetolu ibwadi makwa khabotota biwotitarisa bibwena – vakhelaga vabudaboda wala. Besa pela wala burigimwala votes e, bikarisari biwesa omatala. Kidamwaga sipeula, sivakhasi titolesi e, gala ibwadi. Tevilesi pela wala magisi Political Party lamani bikeulasi e letolasa – taga gala pela wotetila mokwita. Bo lalivala sena agumitagasi avetuta tomota bikatukwayaegusi “Ki mokwita batola amwasawa khena, gala?” Yegula latola makwa khabotota gala pela mwasawa o, yomada wapakha deli khomlagela - GALA. Makwa kebila kabowotetila! Avela mokwita bikatotila biwotetila pela valu khala mwau e bitola – pela tomota. Tevilesi candidates elivalasi mwada makwa khabotota gala pela tokwabitam taga toninagowa simwasawa. Khe, uula lagela PNG Gabena letitaki gewagewa deli ‘corruption’ uula makhegawenala. Pela uula wotetila e, ivigakhesaga mwasawa, khatudewa o, ‘politics’. Bo lalivala makwa mwada ‘politics’ e, lagela levamurimuri mwada bitobobuta, gala, besa mokwita kidikedala wabu, kipem, sepulaki. Besa uula avetuta biwinisi MPs e, gala wala immweki uwasi paisewamwaya; bwena bisisobubunasi wala khetutula e, tomotaga biuwaki wala pilupilu. Mapela pirisi, naga bwena.

Besa uula avetuta bukunagasi mitomota nabweya bugiyu mesinaku tetolu wala bukukipoisi. Tetolu wala! Avela mokwita kudubumisa bivagi paisewa kusakhesa la Vote 1 (One). Makhena 1 gala pela khatuyawana – makhena khasipuwaya gugwadi, litudayasa – pela tubwa makhateki, pela inidayasa deli ludetayasa, pela valu khalamwau lekikausa. Gala pela yebweri, sigiribwela, vilabwela o khena nokhapisi. Kidamwa bukunokhapisisi e, igau biyokhapisemi. Makhalapata goli, kidamwa bukukwatuyuwanisa e, igau bikeita bima bikatuyuwanemi!

Makhena 2 bogwa wala makhala. Avela oninami esakheri kudubumisa bivagi paisewa e kusakhesa la 2. Pela kidamwa mnaga 1 (One) lesala e, lemekiga 2 lewini, taga bo bwena wala omnaga pela mtona esakheri tomotatola wala – gala pela bubekam o, khena lubulabwaga.

Makhena 3 bo makhala wala. Avela tetolula kudubumi bivagi paisewa pela valu e kuseki la 3. Kululuwaisi, makwa biga layusim DUBUMI gala pela yebweri o, khena ninabwela. Makwesi bo desi, bogwa elukwari woula e, tasemwesa sitanaga tatoilakhesa mokwita valu khalamwau.

Gala anukwari amakhala sagwa candidates lelulukwemi mitaga yegula kidamwa bawini e, yokwami deli yegu bita paisewasi. Gala pela agumwareta wala bikukoi itakogu e, mwadaga bukusimakhavasi wala. Komwedodasi wala bitawotetilasi pela valu deli litudayasa.

Nabweya bugiyu avetuta bukuboutisi – tevilemi bogwa lemwemwa okubuutiboutisi e bo kunukwarisa. Avetuta bukusuisi obokesila bouti e, komwedomasi wala candidates bo pikisimasi, igamesa deli ma nambasi, tetala tetala. Miyana pwepula bouti yagala ballot paper e, olopola leginisa 1, 2 & 3 – orakhewa lela opwepwaya. Avela okuninamsi tomatala mtomota e, opapala 1 kugini la namba olui yagala. Esakheri mtona opapala 2 kugini la namba olui yagala. E, tetolula kugini la namba olui yagala opapala 3. Bo mesinaku, mpaisewa bo kuvenoku e, kweita kula omkwaukweda kwaui kham buwa. Mtosinaga tupwela khasi bawa 16, gala sitana bikaiki wowom. Tarigewa bo letomwesa, gala avakha tolesi. Pela besa yagala naga bwena, gala pela ninabwela o, khena nokhapisi. Tetolu wala bikausa naga, komwedonaga aom.

Mmwesala ula bigatona banigada besa yakidasi komwedodasi. Bogwa lanukwari minana tubukona namwedona okuninigadasi wala besa Guyau amakhala bipilasi nanamsa pela bitanagisa khada tokugwasa bibwena. Mitaga ula nigada gala besa wala tokugwela tapwaroru, mitaga komwedodasi wala. Magigu nigada bitayamwasisa biloki besa ToVote (Tobouti) komwedona pela Guyau bikimitali mitadesa bibwena e bitavitusisa olui bitanagasi avela mokwita bikugwaedasi pela davalusa khala mwau. Yakhamesa candidates bo bwena bukinigadasi pela Guyau bipilasemasi oma bubunelasi mitaga adoki mokwita khala kibwabwela biloki Tobouti – pela pawa oyumasi Tobouti – taga ikeilugisa bouti.   E, adoki besa mokwita bitabanisa tokugwa bwena.

“Khe, bo metobu. Bo, lasomata e, igaugwa sitana kubigatonasi, khena kwatukwayayasi.”

PILASI DELI KHAILAILA: Criticisms

Sitana vakhela pilasi, khamayaba, nokhapisi deli wakola biga tomota tevilesi isakhegusi avetuta lavenoku ula bigatona. Ayakhaula tomota sikabitam, sipeulaki, sikatukwayaya deli goli sinagowa. Sena ayebweri senela.

Anokhopisi senela mtosi nunumwaya lepeulakisa letokhewasi ibigatonasi deli tevilesi ivalamsi otapwala sibigatona. Pela uula sena khasimmayuyu mokwita ibanisa metoya makwesi kweyu mwau: khalupwetukula pela litusiya o khena veisiya siginigini deli, khasikatoula o khena vivila leyomwausi okhevalulu. (Osesuya, Kuyawa, Kwemtula, Oiveyova, Oluweta-Yalumgwa, Okheboma, Okinai, Vakuta, Osapola - Luba, Liluta, Khaurikwau, Tubowada, Kwebwaga, Khaulagu, Kuluwa, Vakuta, Kudeuli, Mlosaida, Gumilababa, Bwetalu & Wabutuma.) Kwevilesi wala kwatukwayaya lasela pela khabogigisa, vakhelaga ogu buki wala ekanukwenu.

• “Mwa, yakhamesa makwa valu gala mokwita mina bigatona yakhamesa. Tobigatona mokwita bo lelosa o sagari, wapola, etc. Gala wala avakha bitalivali pela bogwa lokutaivisi wala lemigileu. Gala ambesa tasekeyala khatupoi, pela okukwatupoi e, okumpumapu. Gala makhala MP yokwa e ikwani bitakheyelu makwesi msopa, mluipuwaya o, khena msula.”

 

Mapula: “Kharewaga deli nanamsa khala bwena wala bitayagi wowola oluwaledasi e olui bimla kharewaga. Gala pela MP wala lamama bitakkheyelu.” 

•   “Mwa, yakhamesa makwa valu vakhela bonebona wala kugisa gala wala avakha sitana bitalivali. Makwesi goli kweyu projects mokwitala kuitobubwati: kwetala pela khabitam – amakhala litudayasa biginisi bibwena e, bitanakusisi pela daesaesasi. Mokwitala, MP kwetala tuta bipilaseda, latudaga titoleda aveyam wala e, deli khadatuvaluwa isisu.” E, kweyuwela pela damomovasi.Losuia ospeta besa tuta gagaokuva wala.

 

Mapula: Gala magigu tuvela bukudidokhemi deli mivalu mwada bonebona. Makwesi yagala khakokola bimweeya bikanuvagasi odubasi tomota e igau bikimami sidubumi pela titolesi. Tuvela avetuta bima saiya gugwadi bivigaki mamaokuva wala. Makwesina biga deli nanamsa sena ivakhapusiya deli isakhawari valu. Gala tuvela!

• “Avakha pela gala magim bukunanakwa e bukuwanana pela makwa khabotota (Idalekha, Loya, Oiveyova)?

 

Mapula: Campaign bubunela taem bitaniganaga e deli goli dapeula o yamada. Bogwa legisaki matagu elections makwesi lemwemwa, tevilesi candidates ikanabogwasi e, khalaigimkoila inanotasi. Esaesa ikomdabu. Kugisa kharosi titoleda wala. Taga komwedona wala keda – bitalobogwa e, bitayobari. Sekumwelaga khamatevasisi wala kha campaignisa e, komwedonaga 15 igau wala!

• Avakha pela gala deli musilela o, khena kwetala ‘base’ bukuitau olopola Luba pela bikayori Luba tomotela (Okhabulula, Khetui-Osapola)?

 

Mapula: ‘Base’ bitavatowa bwena mitaga sena vakhela tommwaya deli valu laesaesa ikomdabu. Avetuta biwokuva, avela bimapu tommwaya khasibunukwa, buwa, khasi? Avetuta bita wini bikasikwari wotetila makwesinala. Mwada manila projects pela tomota gala, ilebusa tommwaya/Committee/Scrutineers e, bitomwaga valu. Tevilesi tomwaya sena mina lubulebu – Gabena/tomota lavavagi tadoki goli vegutabusi!

• Biga deli vagi, gala bigaokuva wala! Deli Kilivila lakhetatai gala makhala (Ugwayoba, Wagaluma; Kwewaya Tukwaukwa; Gumkwaradu & Moyokeda, Okheboma).”

 

Mapula: ‘Vagi’ kweyu migila. Kwetala besa tuta wala isepulaki tomota metoya oraisi, sugwa, tia, kharekwa, pwaiki, o khena wa mani. Makwena gala mokwita pela gala ipilasi valu o khena khaukweda mesinaku wala mwau isiseki valu pela paisewa isilibwadi. Makwena yagala khomlagela e, Gabena gala ibulami. Kweyuwelaga, igau towotetila mokwita bisui okhabopaisewa, gala khala wasi besa tomota deli goli avela sala, e bipwetukuri mokwita kweutona projects, kharewaga e, bima pela valu komwedona, gala khatupotala wala khatuposula. Gugwadi komwedona bipilasi, tubwa makhateki bipilasi. E makwena mokwita VAGI. Pakha deli khomlagela lagela wala bitamwau, gala khekwabula pela bita luluwai. Makwa khabotota gala tuuyela, gala pakhala, mapela Kilivila khala gulagula gala iboda bisuki. Silovala wala leitourisa mwada yagala ‘politics’ taga besa ‘parochialism’- tomota sikiduidai. Nagowa, selu, mapela iboda bitasigisa - mwadaga mokwita ipilasi wotetila deli valu khala mwau. Iyokhopisi tomota bwena bidaderisi wala e, sipaisewaga irigewesa, gugwadi khasimwau okhoukweda. Nayu tubukona olopola gala bagulakola e, avakha khalumapula? Magigu tomota bimitalalasi, PIRISI!

• “Samwa letitainasi oturaki deli wa dinghy yokwaga kulilola wala. Khena kusepulakhedasi mwada gala ibwadi oturaki bukutaina e, avetutaga bukuwini bukula kuyubwela, bakhasimwesaga ovalu khaiyomwausi?” (Emmanuel Tebei, Kuruvitu Pastor).

 

Mapula: Kidamwa bukuitusi bibwena, yegula gala kwetala political party ipilasegu o, khena atokela. Mapela gala ula khatumkoila ayosi pela turaki e, makwesi goli yomada deli sepulaki – ‘politics’- ladidoki ‘Parochialism’, pela gala metoya okhamokwita taga osepulaki. Gala simwa ula posters pela khekwabugu (apeki), gala agutobwakuri tebiweki (asilibwadi), gala ula scrutineers o, khena Komiti network aitau valu kwetala kwetala pela bitamnabisi besa ToVote, gala avatowa ‘base’, gala asuki kedala sebugibogi, gala amomom atitaina bugibogi e, gala asepulaki luvalova mani mwada oyagala khatuvivisa valu.

Akhatubwadi besa veyagwa, dalegu deli uluvevai gala magigu biyomadasi siesaesa makhala khasibunukwa e, paisewaga mokwita pela Gabena deli valu khalamwau. Gala pela gala wala ayosi manila mitaga, gala adubumi makhadasi kedala wabu deli sepulaki. Makwena Gabena lapaisewa, gala pela dala. Avela magila biwotetila, gala pela bimwasawa makhala wabu ‘opolitics’e, bitola iwotetila mokwita pela valu khalamwau. Taneneisi gala pela khadabwenasi besa tetala tetala e, bimweeya bitaburigimwalasi. Kidamwa magimi makhala - besa avetuta bawini e, sena nanakwa balumwelaemi, valu khalamwau balumwelai e, bala goli atobudaki nenei agubwena titolegu deli litugwa. Pela bogwa lamapwemi – layomadi ula esaesa e, basuiga banei mapula uliyomada besa yokwami. Besaga gala awabwemi, gala amapwemi mapela avetuta bawini e, bikaiki wowogu pela yokwami deli goli valu khalamwau mokwita. Pela ulataina khalamwau mesinaku wala mtona gwadi yawagu, Motuputupula deli litula ipilasisi, tuwagu Mospikuna pela la dinghy e, kweyu litugwa simani pela ula ticketi mapula, nomination mapula, sopila dinghy e, kweyu khegiya khalaga. Bo mesinaku. Kugisa gala wala ibwadi bitawabu tomota siesaesa pela yomada.

Makhala goli, kedala khatuvivisa lapekila pela, minasi tomata ekanukwenusi valu kwetala kwetala simwa veyola simwa. Kidamwa tokuritomata yakida mokwita e, ibwadi bitakhatuvivisa kidamwa gala, gala iboda bitakharewagi soda khalatomata. Vakhela besa leuvagisa gala, gimwalela wala votes deli khasipopou mtosina torivalu leuwananisa makhadasi keda. Tomota vakhela gala wala immweki uwasi pela khatuvivisa. Besa pela wala wabu kedala – gala mokwita. Lagela PNG Gabena lekikapusi e, tokugwa lesulasulasi - makhadasinala kidikedala. Mapela kuvatusisi mitowotetila bibwena, PIRISI yokwami.  

• “Monagwadi ula tilewai bigatona bogi sena bwena lokuvagi.” (Tomwaya tetala, valu opapala Waikiki)

 

Mapula: Sori wala tomwaya pela gala batugwari veyagwa, sagwa o, kena yegula titolegu bata tati mtilewai. Makwa bigatona ledodou pela khatotila paisewa, gala pela bitavatusisi avela kharitovagi bigatona, makhala Kilivila bisalela. Makwa paisewa pela khada mwausi, mapela gala wala atagwala Kilivila khalagulagula bisuki. Besa lukuvagi mokwita bogwa lokuyomwau nanogu pela, makhala sitana kheilugwala makhadasi keda latateya lewewa pela bikimigileu mwada davatusisi. Mapela kunanamsa bibwena, tomwaya.

 

SIBURERUNA: APPENDICES

 

SIBURERUNA 1

Table 1. Candidates tetala tetala makhabototasa avetuta khalawa lewokuva

 

Candidate	Candidate lakhatuposula mokwita	Ammakhasana candidate lerisisa okhalawa	Candidate la total pela vote 1	Candidate la total avetuta lewokuva khalawa	Candidate lakhatumkoila eloki la total	Candidate lakhabotota avetuta khalawa lewokuva
Vincent Sefala	South Goodenough	8th	392	409	17 (4.1%)	12
William Ebenosi	Central-south Kiriwina	15th	2448	3633	1185 (32.6)	5
Ronnie Kaitolele	South Goodenough	17th	2469	4473	2004 (44.8)	3
Jack Cameron	Kitava, Kiriwina east-west	Towini	2492	6042	3550 (58.7)	1
Jack Dakuna	South Godenough	12th	1605	1873	268 (14.3)	8
Leonard Louma	Central-south Kiriwina	18th	3973	5767	1794 (31.1)	2
Durisi Toitopola	Central Kiriwina	3rd	66	67	1 (1.5)	17
Gregory Binoka	Central Goodenough	13th	2051	2876	825 (28.7)	7
Robert Makai	Kitava-Kiriwina east	10th	518	574	56 (9.7)	10
Brian Pulayasi – sitting MP	Central-south Kiriwina	16th	3124	4297	1173 (27.3)	4
Fisher Dakulala	South Goodenough	4th	163	165	2 (1.2)	16
John Tubueya	South Goodenough	9th	443	501	58 (11.6)	11
Benjamin Jacob	West Kiriwina coast	14th	2419	2939	520 (17.7)	6
Boaz Mataio	South Kiriwina	6th	256	288	32 (11.1)	14
Ephraim Moguna	South Kiriwina	1st	26	26	0 (0.0)	19
Aden Moliola	Central-south Kiriwina	2nd	59	60	1 (1.6)	18
linus digim’Rina	South Kiriwina	7th	356	370	14 (3.8)	13
Selina B. Elijah	West Kiriwina coast	5th	181	189	8 (4.2)	15
Tony Douwa	Kaileuna, Kiriwina west	11th	1279	1377	98 (7.1)	9

 

Pikeita wala babigitoni pela makwa wini Jack Cameron levagi e, bitasemwesaga. Sitana makhala i-igibau Tolukwasisiga pela avetuta ekalaumkulaisa Vote 1 mtona etota namba 3. Mitaga avetuta leritakhesa Vote 2, ikarisau namba 2 (Brian), namba 1 (Leonard) e, ilaga itowa omatala. E, bitaitusiga bibwena, Jack vakhela la taina (campaign) isewa wala wakoya - Goodenough. Mesinaku mkwena wala wiki khalaigimkoila ivilobusi oduvalusa iyoleleu - mwada.

Mesinaku wala bitakhebiga, avela latomota Jack lesimwesa olopo Kilivila iuwotetilasi sena wala vakhegaga paisewa levagisa. Biga omlakhatila makhala, sala mtosi ovalu sikatotila deli goli khena tomwaya Dennis Young layosesila ipaisewa wala. Pela bukuitusi makhala, Leonard usola Brian sikatumkoila metoya Vote 2 makhasana 500 elolaga 1500, mtowenaga lakhatumkoila lewaweya 3500. Besa amakhala leigaki? Besa khalagigisa sena vakhegaga, mwada sala itowesa makhasana 1000 lakesa e, mtonaga lela 3,000. Khaisekila, taga khala gigisa besa ikwani wala ovapwala. To Kinana Ronnie Kaitolele lakhatumkoila bwena, makhasana 2004 – e, sitana lewekeya Jack Cameron. Mtona pela Goodenough, ituma wala Gregory Binboka, 825 lakhatumkoila.

Besa uula lalilivala (olumolela mpana biga dimdim lagini pela makwa election), kidamwa kharewaga bitugwari komwedona wala daboutisi bikalausa – e, khena khalaigimkoila gala tanukwarisa avela mokwita biwini. Taga galala mtosi wala omatala Vote 1 ikausa e, yakhamesaga oruyeki ikatupalemasi wala. Khaguyamgwa gala, khaiseki.

Kidamwa kharewaga makhala, bimweeya bileya mokwita ambesa tomota ninasi. Taga besa evayelusi avela wala ebawa latomota metoya Vote 1 e leyosisa. E, avelaga gala tona, irisisa wala itomwesa. Besa eleya mokwita mani deli vakham i-lebu Vote 1 (Leonard usola Brian evatowasi ‘Base’), esakheri goli mtosi lepatimakhavasi mani deli guguwa (khena Jack, Ronnie, Moyola, Molilobida, Toneuya – pela Khaileuna). Kidamwa komwedona candidates si 1, si 2, deli si 3 bikalausa, besa khaiseki. Sena ula dubumi, vakhela tomota si 1 igimlakhesa mani deli guguwa. Pelaga si 2 deli si 3 ilaisa iloki ambesa idubumisa mtona khena minana candidate bivagi paisewa. Galaga, iluimakhaisa wala iwau. Elivalasi Tevilesi, “Bakhalaisa bilo inei buwa wakoya!” Taga besa tubunagowa kidikedala.

Sena ula dubumi, kidamwa komedona candidates si bouti (1, 2 deli 3) bikalausa, makwesi nanamsa pela ‘base’ o khena burigimwala nona metoya wa mani deli guguwa bimata. Candidates bipakhesa, pela uula bibaseda esaesa bitakhatotila bitalai sena kwevekha esaesa pela bitavayori 1, 2 deli 3. Besaga tuta uula candidates leiyomadasi pela uula leiyamwasisi Vote 1 wala - 2 deli 3 gala sena imweki uwasi. Tobouti goli makhala wala. Leyamwasisa Vote 1 wala lakeda, pelaga 2, 3 gala sena ikaiki uwasi. Bogwa makhala kwebogwa bouti khe, gala sena khaladaila pela bouti lakhesakhaula. Bisubuyalu mani wala bigeda! Mitaga kidammwa bitasonukuri komwedona wala candidates si 1, 2, deli 3 e, bileya mokwita ambesa ninasi tomota. Igau bikila khalatau mokwita. Besaga tuta mani wala ekikarewaga. Gala wala idaila, makhala kwebogwa e, makhala mkwena kwevau.

 

SIBURERUNA 2

Table 2. Khalakhomimisi datoboutisi minaKilivila pela 2007 elections

Bouti (Votes)	No.	%
1. Khadabawasi toBouti wa list (Common Roll)	26,724	-
2. Khadabawasi lataboutisi mokwita	24,856	93 of 1
3. Khalabawa yaminibweta bouti lekalausa	24,320	97.8 of 2
4. Khalabawa yamigigaga bouti lekatuparisa	536	2.1 of 2
5. Khasibawa mtosi gala iboutisi	1,868	6.9 of 1
6. Bouti khalabawa levirisa avetuta mtosi candidates opwepwaya levarisisa	1,755	7.2 of 3
7. Yakkaliga bouti – besa sibouti mtosi candidates bo levarisisa – gala takhalauvewa	2,562	-
8. Besa edokhesa (50%+1) ‘Absolute Majority’: Ave candidate biyosi makhena namba metoya Vote 1 e biwini. Taga gala wala.	12,160	48.9 of 2

SIBURERUNA 3. Lupepi wawaya, Okupukopu – Jan. 2008. Mtosi tomota komwedosi wala iginisi oduvalusa, taga teyu wala ipasisi e, ilosa ipaisewasi opilatala. Lagela dinghy leyosisa, deli emapusa sopila kwedadina – gala pela Memba iseki. Pelaga Candidates siburigimwala metoya o campaign olopola, besa gala, teyu wala simwa si dinghy!  Komwedonaga tobouti khasilam wala, ke?

 

Photo: Y. Tom’tavala 2008

 

 

SIBURERUNA 4. Mweuya, Jan. 2008. Tevila mtosi gugwadi bikipewarisa olopola Kiriwina High School nabweya bugiyu? Sitana inukwarisa pela wabouti wala latayomwausa sikabosisu nabweya bugiyu? Bwena wala desi tavakham-makavasi e, gugwadiga khasi mwau igau avela biiyamata, ke?

Photo: Y. Tom’tavala 2008

 

 

 

 

 

SIBURERUNA 5. Dasimlasi Kilivila masimlasi – gala tona simlela. Gala ibwadi bitakhatuyawanasi tuvela. Tomota bogwa ekomsausa khai, khawelu deli pwepwaya. Gugwadi biginisi bibwena, bisilaisa simla e, bineisi khabitam bwena pela khasibwena deli litusiya tuta makhateki.

 

SIBURERUNA 6. Kuitusisa mi Candidate bibwena! Photo: digim’Rina 2007 photo files

Makhasana June 2008, APNG lesinisi kheyoyowa latuta tuvela. Khetala, kwetala wiki – oSabata wala bikutakota e, biyoyowa.